Timek Ti Barangay
PHILHEALTH POINT OF CARE PROGRAM TI PRUBINSIYA ITI CAGAYAN – ADUN ITI NATULUNGAN NA
Maysa kadaguiti prayoridad iti liderato ti Gobyerno ti Umili ket ti panakaited ti umiso a serbisyo ken tulong kadaguiti kakailian a nakurapay a marigatan para iti serbisyo medikal nu dinalapus ida ti nakana a sakit a pakaigapuanan ti panakaidalit da.
Manipud idi Pebrero 10, daytoy a tawe- en ingga iti agdama, addan sumurok nga lima-gasut nga katao ti natulungan na daytoy a programa ket kadaguiti masungad nga aldaw ad-adu pay ti matuluingan na kangrunaan na daguiti saan a naparaburan ti talged ti panagbiag.
Ania kadi daytoy PHILHEALTH POINT OF CARE PROGRAM ti Gobyerno ti Umili? Iti simple a pannarita, daytoy ket programa iti agdama nga administrasyon a tumulong kadaguiti pasyente a naadmitar iti hospital, tapnu maikkan da kadaguiti umiso a serbisyo babaen iti panangigiya kadakwada daguiti empleyado a nadutukan a mangimaton kadaytoy a programa, kas koma kadaguiti sumaganad; ti panakairegistro da iti “Philhealth” nu ti pasyente ket indigent wenno awan kapasidad nga agbayad iti gastos da iti hospital ken awan pay ti Philhealth na, mainayon pay ti panakaited ti libre nga agas. Awan bayadan iti x- ray ken laboratoryo nu kasapulan ti pasyente.
Kas pammaneknek dakkel ti panagyaman daguiti pasyente a natulunganen daytoy a programa a naggapu iti ili ti Abulug, Allacapan, Aparri West, Pamplona ken Ballesteros, a naadmitar iti Ballesteros District hospital kas maysa kadaguiti a nakaitedan daytoy a serbisyo.
Nakuna da pay daguiti natulungan ta sapay la koma ta agtultuloy daytoy a tulong ken programa ti Gobyerno ti Umili nga idadaulwan ni Gobernador Alvaro T. Antonio ken Bise Gob. Leonides N. Fausto. Napalaus ngarud ti panangipeksa da iti panagyaman da kadaguiti amin a tulong a naggapu ti Gobyerno ti Umili.
Agbiag ti Gobyerno ti Umili!
Agtultuloy ti napintas a serbisyo ti Philhealth Point Of Care ti Prubinsiya ti Cagayan.
